काठमाडौँ। सहिद स्मारक ‘ए’ डिभिजन लिगअन्तर्गत सोमबार भएको खेलमा सातदोबाटो युथ क्लबलाई जावलाखेल युथ क्लबले २-० को अन्तरले हराएको छ। काठमाडौँको  त्रिपुरेश्वस्थित दशरथ रंगशालमा भएको खेलमा विपिन कँडेल र निकोलस फर्नान्डेसले १-१ गोल गर्दै आफ्नो टिमलाई जिताएका हुन्। विपिनले खेलको ५०औं मिनेटमा र फर्नान्डेसले खेलको  ७०औं मिनेटमा गोल गरेका थिए।

यो जितसँगै जावलाखेल ६ खेलबाट ७ अंक जोड्दै नवौं स्थानमा पुगेको छ भने सातदोबाटो भने ८ अंकसहित पाँचौ स्थानमा छ। 

यो खेलसँगै लिगको छैटौं चरणको खेलहरू सकिएको छ। अहिलेसम्मको तालिका हेर्दा  मछिन्द्र फुटबल क्लब १४ अंक जोड्दै शीर्ष स्थानमा,  मनाङ मर्स्याङ्दी १३ अंक सहित दोस्रो स्थानमा र संकटा क्लब १२ अंक सहित तेस्रो स्थानमा रहेको छ।