श्रम, रोजगार तथा सामाजिक सुरक्षा मन्त्रालयले वैदेशिक रोजगारमा हुने ठगी रोक्न ‘हेल्प टु हेल्प १० सेल’ पुस ८ गतेदेखि सञ्चालनमा ल्याउने भएको छ। यो सेवा देशभरका ७५३ स्थानीय तह, ७ प्रदेशका श्रम कार्यालय, वैदेशिक रोजगार विभाग र समाधान कल सेन्टरमार्फत कार्यालय समयमा उपलब्ध हुनेछ।

यस सेलको मुख्य उद्देश्य श्रमिकलाई आधिकारिक सूचना उपलब्ध गराउनु, डिजिटल माध्यमबाट हुने ठगी र झुटा प्रलोभनबाट जोगाउनु, र सुरक्षित वैदेशिक रोजगार सुनिश्चित गर्नु हो। यसमार्फत श्रमिकले रोजगारीको माग भएका देश, आधिकारिक म्यानपावर, आवश्यक योग्यता, उमेर, तालिम, स्वास्थ्य अवस्था, लागत, भुक्तानी प्रक्रिया, सुरक्षित जाने विधि र आधिकारिक सम्पर्क ठेगाना जस्ता १० प्रमुख प्रश्नका उत्तर पाउनेछन्।

यो प्रणाली अन्तर्राष्ट्रिय आप्रवासन दिवस (डिसेम्बर १८) को अवसरमा सुरु गर्न लागिएको हो, जुन नेपालमा पुस १–७ गतेसम्म साप्ताहव्यापी रूपमा मनाइँदैछ।